Opel nis ‘pushtimin’ e Kinës dhe Amerikës Jugore

Ajo që tek ne njihet si Opel, në Britani është Vauxhall dhe Holden në Australi, mirëpo në General Motors besojnë se marka nga qyteti i Russelsheimit është e gatshme që nën brendin e vet të pushtojë tregje të reja, veçanërisht atë më ta madhin në botë – tregun kinez.

Vitin e kaluar në shtetin me më së shumti njerëz në botë Opel ka shitur 4.000 automjete, derisa, p.sh., Audi në të njëjtën periudhë ka shitur 130.000 automjete. Andres Kroemer, zëdhënës i Opel, ka thënë për Deutsche Welle se janë duke planifikuar t’i reklamojnë automjetet e tyre si automjete Premium të dizajnuara në Evropë.

“Është duke u rritur numri i blerësve kinezë të cilëve u pëlqejnë automjetet evropiane dhe të cilët mund t’i ofrojnë vetes blerjen e automjeteve të tilla”, ka deklaruar Kroemer.

Pos tregut kinez, Opel supozohet se është i interesuar edhe në tregjet tjera prandaj në të ardhmen e afërt planifikon të depërtojë edhe në tregjet e Amerikës Jugore dhe në Australi.