Forcohet bashkëpunimi rajonal në fushën e sigurisë së kufijve

Ministri i Punëve të Brendshme, Zenun Pajaziti po merr pjesë në Konferencën ministrore mbi bashkëpunimin në fushën e sigurisë së kufijve në Evropën Juglindore. Konferenca po zhvillon punimet në Tiranë nën kryesimin e Presidencës spanjolle të Bashkimit Evropian.
Punimet e kësaj konference i përshëndeti me një fjalë rasti kryeministri i Republikës së Shqipërisë, Sali Berisha.

Në këtë konferencë po marrin pjesë ministrat e punëve të brendshme të vendeve të Evropës Juglindore, përfaqësues të Bashkimit Evropian, përfaqësues të organizatave ndërkombëtare si OSBE, DCAF, FRONTEX, IOM, ICMPD etj.

Ministri Pajaziti në fjalën e tij para të pranishmëve prezantoi progresin e arritur në kontrollin dhe menaxhimin e kufijve shtetëror, duke shprehur njëherazi gatishmërinë e Republikës së Kosovës për të qenë partner me vendet tjera të rajonit në drejtim të kontrollit efikas të kufijve shtetëror si një ndër parakushtet kryesore për procesin e përafrimit dhe anëtarësimit të vendeve të Ballkanit Perëndimor në Bashkimin Evropian.

Në fund të Konferencës u miratua edhe Deklarata Ministrore që riafirmon përkushtimin e vendeve të rajonit për të bashkëpunuar në fushën e sigurisë së kufijve në Evropën Juglindore.