Tetova qytet i paqes

Përmes një konference për media të mbajtur në komunën e Tetovës, të martën është shënuar përfundimi i projektit “Fitoje të pa njohurën, njoftoi të tjerët”, që u realizua në bashkëpunim me forumin civil për Paqe ZFD.

Projekti përfshiu trajnime dhe seminare me nxënës me përbërje të përzier etnike që pati për synim futjen e bashkëpunimit dhe tejkalimin e barrierave etnike në mes fëmijëve.
Kryetari i komunës së Tetovës Prof. Dr. Sadi Bexheti tha se kjo është tregues i vendosmërisë dhe seriozitetit tonë që qyteti i Tetovës të njihet si shembull i bashkëjetesës dhe si qytet i paqes dhe mirëkuptimit. Këto aktivitete janë vetëm një fillim i kampanjës sonë për ta shpallur Tetovën “Qytet të Paqes” në nivel nacional dhe ndërkombëtar.

“Ne jemi të bindur se kjo nismë e komunës së Tetovës do të mbështet edhe nga ana e Organizatat joqeveritare që funksionojnë në komunën e Tetovës, organizatat ndërkombëtare në vend si dhe kori diplomatik i akredituar në Maqedoni. Tani jemi duke përgatitur tryezën e rrumbullakët ku edhe zyrtarisht do të nisim kampanjën Tetova Qytet i Paqes”, tha Bexheti.

Drejtoresha e forumit civil për Paqe ZFD, znj. Sillke Maier Vit, falënderoi komunën e Tetovës për bashkëpunimin, ndërsa theksoi se projekti është një fillim i mirë për krijimin e liderëve të rinj të cilët do të tejkalojnë konfliktet që mund të paraqiten.
Në fund të ceremonisë u ndanë certifikata për nxënësit pjesëmarrës në këtë seminar.