SHKËNDIJA "SHKELI" RABOTNIÇKIN

Shkëndija e Tetovës me rezultatin 3:0 "shkatëroi" Rabotniçkin në ndeshjen e fundit të javës së tretë të Ligës së Parë të Maqedonisë në futboll. "Kuq e zinjtë" pasditën e të dielës zhvilluan një nga ndeshjet më të mira në historinë e tyre, pasi përveç fitores bindëse, nëse bazohemi në ngjarjet që ndodhën në teren, atëherë ndoshta fitorja e tetovarëve do të duhej të ishte me 7,8 gola diferencë. Pas sulmeve fillestare, Ersen Sali në minutën e 8-të solli epërsi për "kuq e zinjtë". Në vazhdim rastet e Shkëndijës rradhiteshin si në shiritin filmik, mirëpo pjesa e parë u mbyll me epërsi minimale të vendasve. Në start të pjesës së dytë pas assistit të Sali-t, Muhamed Huseini shënoi për 2:0. Dy minuta më vonë krosim i saktë i Nebi Mustafit, ndërsa debutuesi në fanellën e Shkëndijës, Andre Lomami shënoi për 3:0, që në fund u tregua të jetë rezultati përfundimtar i takimit. Kjo ishte fitorja e parë e Shkëndijës në kampionatin e sivjetëm, me të cilën tani arrin në kuotën e 4 pikëve, duke mbajtur pozitën e pestë në renditje.
Vlen te ceket se përballja Shkëndija-Rabotniçki u zhvillua pa praninë e publikut për shkak se tetovarët janë të dënuar nga FFM-ja, mirëpo tifozët më të flaktë të "kuq e zinjëve" mundën të ndjekin ndeshjen drejtëpërsëdrejti nga jashtë stadiumit ku ishte siguruar një telivizor në të cilin transmetohej "live" përballja.