Fabregasi festoi me fanellën e Barcelonës

Kapiteni
i Arsenalit, Çesk Fabregas gjatë festës së titullit të kampionit të
botës në Madrid është xhiruar i veshur në fanellën e Barcelonës.
Fanella e klubit katalanas në trupin e 23-vjeçarit spanjoll nuk u
paraqit rastësisht. Gjatë festimit ishin bashkëlojtarët e tij të
kombëtares, anëtarët e Barcelonës, Xherard Pike dhe Karles Pujol, të
cilët e shtyn për ta veshur atë fanellë. Fabregas me këtë rast qeshi
dhe bëri me gjeste se nuk e kishte pritur një gjë të tillë. Megjithatë
ai nuk rezistoi shumë, madje as kur portieri rezervë i kombëtares
spanjolle, Pepe Reina e prezantoi si përforcim të ardhshëm të
Barcelonës. Menjëherë pas finales ndaj Holandës, Fabregasi kishte thënë
se është krenar që është pjesë e Arsenalit, derisa trajneri i
“Topçinjve”, Arsen Venger kishte refuzuar takimin me drejtuesit e
Barcelonës, të cilët dëshirojnë të negociojnë transferimin e
mesfushorit spanjoll, i cili ka kontratë me Arsenalin deri në vitin
2015. Ndërkohë “El Mundo Deportivo” ka bërë të ditur se presidenti i
Barcelonës, Sandro Rosell është i gatshëm të ndajë 45 milionë euro për
të siguruar shërbimet e Fabregasit.