Aktivitete për vitin “Nënë Tereza”

nga **Geri** Mon 19 Apr 2010 - 6:50

Shenjtorja shqiptare, Nënë Tereza, do të përkujtohet në këtë 100-vjetor të Lindjes së saj, shpallur edhe si Viti “Nënë Tereza”, me një seri aktivitetesh kulturore që do të nisin nga mbrëmja e sotme me një koncert homazh në Akademinë e Arteve të Bukura dhe do të përmbyllen në 19 Tetor, Ditën e Lumturimit të saj.
Të gjitha këto aktivitete që do të organizohen nga institucione të ndryshme të artit dhe kulturës në vend do të synojnë nderimin e kësaj figure unike të mbrojtjes së paqes në botë, do të shprehej në konferencen për shtyp Ministri i Kulturës, Ferdinand Xhaferraj.
Sipas Ministrit Xhaferraj aktivitetet po ashtu i mëshojnë edhe idesë për të reklamuar edhe më fort origjinën shqiptare të Gonxhe Bojaxhiut.
Aktivitetet do të përmbledhin një ekspozitë të 12 shenjtorëve, me vepra për Nënë Terezën dhe personalitete shqiptare të vlerësuar nga Selia e Shenjtë; Konferenca shkencore, shfaqje filmash dokumentare; çelje e një panairi librash kushtuar humanistes, ngritjen e një memoriali pikërisht në datën e lindjes, 26 gusht; Maratonën e Paqes Prishtinë-Shkup-Podgoricë-Tiranë, si dhe Festivalin Ndërkombëtar të Koreve, që do të mbahet në Ditën e Lumturimit të Nënë Terezës, me 19 Tetor. Një koncert homazh i orkestres së harqeve e nderon humanisten sontë në mbrëmje me veprën e madhe “Stabat Mater” e Pergolezit, si dhe pjesë Albinoni e Këngë Popullore Qytetare.