E ëndërron “Eurosong”-un

Nuk mund ta cilësojmë si këngëtare e dhënë pas festivaleve, edhe pse në shumë prej tyre e kemi parë të ketë performuar. Ndonëse nuk kanë munguar edhe çmimet me të cilat është kurorëzuar, por nuk është e dhënë pas tyre. Gentiana Ismajli parapëlqen të paraqitet në publik me ndonjë këngë apo edhe videoklip të ri se sa të ruaj kohën për paraqitje në festivale. Megjithkëtë nuk janë të pakta këngët që i ka sjellë publikut dhe të cilat vazhdojnë të jenë hite në tregun muzikor. Nëse do të zgjidhte një festival për të cilin ëndërron të bëhet pjesë e tij, është festivali “Eurosong”, e që në të ardhmen ndoshta do t’i realizohet kjo dëshirë, pasi tani edhe Kosova është pranuar që të marrë pjesë në këtë garë muzikore.

“Nëse do të kisha zgjedhur se në cilin festival do të doja të merrja
pjesë me shumë dëshirë, atëherë do të ishte “Eurosong”-u për të cilin
festival ëndërrojnë thuajse të gjithë këngëtarët. Unë këtë do ta veçoja,
sepse për mua është festivali më i mirë ndërkombëtarë. Mirëpo nuk e
përjashtoj faktin se edhe në Kosovë dhe Shqipëri janë disa festivale të
mira”, ka thënë ajo për “Zërin”.

Urojmë që Genta në një të ardhme të afërt ta përfaqësoj Kosovën në
këtë festival, ngase për shumë adhurues të saj e meriton të jetë pjesë e
“Eurosongut”.