Diellza tregon sekretin e adoleshentes

Ajo ka diçka për të na thënë. Është një sekret adoleshenteje, janë ca fjalë që ajo kësaj here do t’i ndajë me ne...Dhe, ky tregim i saj vjen përmes vargjeve të këngës “Kam diçka që dua ta them” me të cilën këngëtarja e re Diellza Dobroshi konkurron në festivalin “Top Fest 8”.“Ndjesitë që i kam përjetuar në Tiranë kanë qenë të papërshkrueshme, duke marrë parasysh që konkurrova në një eveniment kaq të madh, sikur është “Top Fest”-i. Kjo ndjesi m’u fuqizua edhe më shumë kur u ktheva në Prishtinë, pasi të gjithë më pritën mirë dhe e shprehën pëlqimin e tyre ndaj këngës dhe performancës sime atje”.

“Kënga i përshtatet moshës sime dhe flet për një adoleshente e cila
shpreh ndjenjat e saj duke bërë monolog me veten. Në ‘facebook’ po marr
shumë pëlqime dhe vlerësime për këngën. Normalisht po më bëjnë të
ndjehem mirë” , ka thënë Diellza.
Këngëtarja prishtinase, e cila ndjek studimet në klasën e nëntë,
thotë se nuk është optimiste se mund të fitojë ndonjë çmim, porse vetë
paraqitja në këtë festival mban gjallë entuziazmin e saj për të bërë
krijime të reja dhe për të vazhduar me muzikë.
“Nuk pres të fitoj ndonjë çmim, por për mua do të ishte sukses të
hyja në finale, meqë konkurroj me emra shumë të njohur të muzikës
shqiptare. E rëndësishme për mua është që marr pjesë, pasi është mundësi
shumë e mirë e promovimit.
“Mendoj se do të vazhdoj të merrem me muzikë. Do të realizoj një
videoklip, mbase të kësaj kënge. Patjetër që do të realizoj edhe këngë
të reja, mirëpo më ngadalë”, ka përfunduar Diellza.