Gold AG sjell “Realitet”-in

Reperi kosovar Arian Agushi, i njohur si “Gold AG”, ka realizuar
edhe albumin e tij më të ri të titulluar “Realitet”, i katërti në
karrierën e tij, dhe i cili është hedhur në treg që nga shtatë marsi.“Albumi
përfshin tema të ndryshme ashtu siç pret edhe publiku nga unë. Në këtë
album janë të përfshira tema të ndryshme sociale, me një fjalë jam
munduar të paraqes realitetin në të cilin jetojmë. Çdo fjalë që është
shkruar në tekstet e këngës është dalë nga zemra, prandaj edhe e kam
quajtur “Realiteti”, ka thënë “Gold AG” për “Zëri”.
Përkundër problemeve të mëdha që po hasin këngëtarët tanë për shitjen e
albumeve, Ariani thotë se nuk qëndron keq në këtë aspekt.
“Unë kam fitime edhe prej shitjeve të albumit, por kur bëj album, nuk pres që me çdo kusht të përfitoj prej tij”, ka thënë ai.
Ai gjithashtu ka theksuar se menjëherë ka nisur përgatitjet të këngëve
të reja, ndërsa njërës prej këngëve do t’ia realizojë edhe video-klipin.
“Pas publikimit të këtij albumi, kam filluar të incizoj këngë të reja
për albumin tjetër. Katër këngë janë të përfunduara dhe do t’i nxjerri
kohë pas kohe. Ndërkaq, njërës nga këngët do t’i realizoj edhe
video-klipin”, ka përfunduar ai. /Telegrafi/