Greta dhe Vilma Zenelaj, dy shqiptare në Hollywood

Greta dhe Vilma Zenelaj janë dy shqiptaro-amerikane që tashmë
kanë filluar karrierën e tyre në fushën e filmit në Hollywood dhe kanë
themeluar edhe kompaninë e tyre filmike “Colored Films”.“In
the woods” është filmi i fundit i dy motrave shqiptare në Hollivud,
Vilma dhe Greta Zenelaj, premiera e të cilit do të shfaqet me 19 mars në
Ontario të Kandasë, të cilat deri tani kanë përfunduar me sukses edhe
një film tjetër të metrazhit të gjatë, komedinë “What do I do now?”
(Çfarë të bëj tani?).
Skenari i filmit të pavarur me buxhet të kufizuar “In the woods”
është shkruar dhe drejtuar nga vetë Vilma, e cila është edhe regjisore e
filmit, ndërsa rolin kryesor në film e luan Greta.
Në një intervistë për ‘Zëri i Amerikës’, Greta dhe Vilma kanë
biseduar mbi sfidat e konkurrencës në kinematografinë hollivudiane si
dhe projektet e tyre për të ardhmen.
“Filmi ‘In the Woods’ sapo është pranuar në Female Eye Festival, për
të marrë pjesë në Toronto në muajin mars, si dhe në New York Film
Festival, i cili do mbahet në fillim të prillit”, thotë Vilma.

Aktorët David Landry dhe Greta Zenelaj në filmin“In The Woods”
Vilma dhe Greta shkuan në Shtetet e Bashkuara në vitin 2003 dhe u
vendosën në Los Anxhelos. Ëndrra e tyre ishte të bënin karrierë në një
prej fushave më me konkurrencë të artit dramatik, në kinematografi.
“Mënyra se si fillova unë karrierën ishte me disa pjesë teatrale këtu
në Los Anxhelos. Aty ishin prezantimet e mia të para. Pastaj mora pjesë
në dy reklama dhe disa filma studentësh. Filmi im i parë me metrazh të
gjatë ishte filmi horror ‘Day of the Dead’ apo ‘Dita e të Vdekurve’.
Pastaj filmi im i dytë, por i pari që bëmë si kompani ishte komedia
‘Çfarë të bëj tani’ dhe filmi i fundit titullohet ‘Në pyll’”, ka shtuar
Greta.

Regjisorja Vilma Zenelaj (djathtas) gjatë xhirimeve të filmit “In the woods”
Në shtator të vitit 2008, Greta dhe Vilma Zenelaj themeluan së bashku
kompaninë e tyre filmike Colored Films, një hap mjaft i guximshëm dhe
ambicioz në një vend që vlerësohet si origjina e filmave më të mirë në
botë. Kjo është edhe kompania e parë shqiptare kinematografike në
Hollywood.
“Ideja për krijimin e kompanisë ‘Colored Film’ na erdhi sepse mund të
jenë shumë rrugë që mund të ndjekësh për pasionin tënd, dhe ne pamë
shumë miq që ishin aktorë dhe merreshin edhe me prodhimin e filmave.
Prandaj, ne menduam se duke qenë dy veta, mund ta krijonim lehtësisht
kompaninë tonë”, ka shtuar Vilma.
Tani, dy motrat po punojnë për projektin e tyre të tretë, i cili do
të ketë një temë që lidhet drejtpërdrejt me jetën e tyre personale dhe
përjetimet gjatë imigrimit nga Shqipëria në Amerikë.
“Ka të bëjë me një histori shqiptare dhe amerikane që nuk është
treguar ndonjëherë. Kemi shumë besim tek potenciali i këtij projekti”.
“Pjesa e parë e filmit, rreth 20 minuta do të jetë në Shqipëri,
ndërsa pjesa tjetër do të xhirohet në shtetin e Miçiganit. Mund të themi
se filmi është bazuar në histori të vërtetë sepse shumica e këtyre
ngjarjeve i kemi përjetuar edhe vetë në një mënyrë apo një tjetër. Dhe
ngjarjet zhvillohen në vitet 1990 në Shqipëri, tamam në atë kohë kur
filluan këto probleme”, kanë përfunduar motrat Zenelaj. /Telegrafi/