“Vdes” laboratori i fundit fotografik

Filmi i fundit në
historinë e aparateve fotografike u zbardh sot, në laboratorin e fundit
të teknologjisë së vjetër, i cili u mbyll përgjithmonë në mesditë.


Ngjarja ndodhi në Kansas të Shteteve
të Bashkuara të Amerikës, ku filmi i prodhuar nga Kodak u zbardh brenda
dhomës së errët. Vetë kompania nuk prodhon më filma të tillë që prej
vitit 2009.

Duke nisur që nga viti 1935, Kodak ka shkruar historinë e fotografisë.
Filmat e saj u përdorën gjerësisht nga specialistët dhe njerëzit e
thjeshtë, pasi ishte në gjendje të ofronte detaje dhe ngjyra që asnjë
film tjetër në botë nuk mund të riprodhonte.

Kodak ishte kompania që shpiku edhe aparatin e parë fotografik e filmin e
parë me ngjyra të historisë, por ata nuk mundën të krijonin asgjë që
mund të konkurronte me zhvillimin marramendës të aparateve dixhitale.

Laboratori i mbetur në Parsons, Kansas, kishte informuar se në fundin e
vitit do të mbyllej dhe si rrjedhojë, me dhjetëra mijëra njerëz lanë
filma të vjetër gjatë vitit në këtë vend.

53-vjeçari Jim DeNike shpenzoi pothuajse 16 mijë dollarë, për të
zbardhur mbi 1 500 filma, për një total prej rreth 50 mijë fotografish,
të gjitha me pamje nga trenat.

”Kodachrome nuk ishte vetëm një film, por një ikonë e vërtetë e një
epoke, filmi i parë me ngjyra që mund të blihej nga të gjithë”, deklaroi
Todd Gustavson, drejtues i një muzeu fotografie pranë laboratorit.

Fotoja e fundit e printuar, nga teknologjia e filmit është ajo e stafit
të laboratorit, që duke nisur që prej ditës së sotme duhet të nisin të
kërkojnë një punë të re.