Liga e Kampionëve, Barca-Inter gjysmëfinalja e pare

Barcelona-Inter
është gjysmëfinalja e parë e këtij sezoni të Champions Leagues. Këto
janë dy emrat e dala nga përballjet çerekfinale të ditës së martë.

Lionel Mesi është ai i cili ka mundur
i vetëm Arsenalin në “Camp Nou” duke shënuar katër gola kundrejt një të
anglezëve.

E fillojnë pikërisht djemtë e Arsen Venger ata
serinë e golave, duke kaluar në avantazh në minutën e 18-të të takimit
pas një kombinimi perfekt të Walcot me Bendtner. U dukën ambicioz
topçinjtë në këtë ndeshje të dytë me katalanasit, por ky gol vetëm sa ka
nxehur argjentinasin e Barcelonës i cili merr përsipër kualifikimin e
skuadrës së tij për në gjysmëfinale.

Dy minuta pas këtij goli
Mesi fillon të hipnotizojë kundërshtarët me magjitë e tij të
njëpasnjëshme. Në minutën e 37-të nga brenda zonës, atë që nuk bëjnë
sulmuesit e tjerë e bën sërish ai, duke kaluar Barcelonën në avantazh me
golin e dytë. Por pa përfunduar gëzimin këtij goli të dytë, ky lojtar
jashtëtokësor lë gojë hapur kundërshtarët dhe në mënyrë të veçantë
portierin Almunia me golin e tretë, duke e mbyllur këtë pjesë të parë të
takimit në 3-1.

Në pjesën e dytë nuk mbetet gjë tjetër veç
administrimit të avantazhit, përpjekjet e Arsenalit nuk ndryshojnë asgjë
dhe Mesi i jep goditjen e fundit portierit kundërshtar dhe mbrojtjes
duke shënuar golin e katërt e duke vulosur këtë poker të tij personal
përball 11 lojtarëve të Arsenalit.

Barcelona-Inter, kjo do të
jetë gjysmëfinalja e parë pas 7 vjetësh për zikaltrit dhe që i çon ata
shumë pranë finales së Madritid dhe trofeut të Champion Leagues, një
ëndërr që sipas vetë Mourinjos ka vetëm 25% të mundësive të realizohet.


Ndeshja e tyre e parë gjysmëfinale do të zhvillohet më 20 prill
e do të luhet në Milano, ndërkohë që ndeshja e kthimit më 27 prill. Nga
këto dy ndeshje do të dalë dhe skuadra që do të shkojë në finalen e
madhe në Santiago Bernabeu të Madridit më 22 maj.