Në rrugën Prishtinë-Podujevë, dy të vdekur dhe katër të plagosur

Dy persona kanë vdekur, ndërsa katër pjesëtarë të KFOR-it, janë lënduar rëndë në një aksidenti të trafikut që ka ndodhur në magjistralen Prishtinë-Besianë, kanë konfirmuar zyrtarë të Policisë së Kosovës.
Brahim Sadriu, zyrtar për informim në Policinë e Kosovës, ka thënë se aksidenti ka ndodhur në orët e paradites, me ç’rast kanë vdekur dy persona F. Shala dhe F. Shala, ndërsa janë lënduar rëndë katër pjesëtarë të KFOR-it.
“Sot në orët e paradites në fshatin Trudë, përball pompës së benzinës “Bingo Benz”, ka ndodhur një aksident me fatalitet, ku ka qenë e përfshirë një veturë e KFOR-it xhip dhe një veture civile ‘Nissan’ me targa të Kosovës. Si pasojë e përplasjes së këtyre automjeteve, dy persona kanë vdekur dhe katër të tjerë janë të lënduar rëndë”, ka thënë Sadriu.
Aksidenti ka ndodhur kur vetura civile, në të cilën ndodheshin viktimat, në rrethana ende të panjohura ka dalë në shiritin tjetër të rrugës duke u ndeshur me një makinë të KFOR-it, që vinte nga ana e kundërt.
Pjesëtarët e lënduar të KFOR-it janë dërguar për trajtim mjekësor në kampin “Bonstill”.